คอลัมน์เสียงอีสาน
กาพอีสาน
ปฏิวัติระบบสงฆ์เสียที (ภาค 5)
โดย หมอลำเซียงสี
(
ระบบ) เครื่องยนต์สงฆ์มันหากเพพังฮ้างฟันเฟืองมันฝืด
ควรสิปืดผ่าเครื่องออกมาค้วน(คว้าน)แต่งบ่อนเพฯ(เบิ่งก่อนนา)
ศาสนาเฮานี้ พระสงฆ์มีบทบาทมาก
หากแม่นสงฆ์นี่แหล้วเป็นโฮงเบ้าหล่อหลอม
ชาวพุทธเฮาอีกพร้อมเอาใจใส่บ่ไลละ
ปฏิบัติองค์พระแล้วจื่อจำเฮ็ดนำก้น
สาธุชนเหมิดทั้งค้ายอยากเห็นลายพระสงฆ์เด่น
คืออยากเห็นสังฆเจ้าผู่เนาอยู่อารามวัด
ปฏิบัติบำเพ็ญเด่นงามตามคลองเค้า
คือสมัยพุทโธเจ้าบรมศาสดาจารย์
ได้ประทานมัคคาท่องป่องเทียวเอาไว้
ธรรม-วินัยเป็นฐานตั้งคอยระวังอย่าประมาท
ศึกษาศาสน์ด้วยปัญญารอบรู้ เฮียนฮู้แล้วฮ่ำฮอน
นำไปสอนอบรมต้านตักเตือนใจฆราวาส
เที่ยวประกาศเผยแผ่ให้ญาติโยมได้รสพระธรรม
พระต้องทำ ต้องนำหน้า ไตรสิกขาต้องเฮียน เฮียนดูแล้วจื่อ
ถือตามคลองต้องเฮ็ดได้ให้ชาวบ้านเพิ่นเฮ็ดนำ
สอนให้จำ นำให้ตรงตามเป้า ดึงนำเขาให้ถืกป่อง
อย่าสิเต้นข้ามฮ่อง พาญาติโยมแหว่ข้างฮั้ว
พาโยมมั้วหมื่นขี้ตม
เฮ็ดให้สมอบรมได้ นำพาโยมเขาไปเฮ็ดให้ได้เป็นตัวอย่าง
ฮู้จักละจักวางถือสันโดษเข่าไว้ จิตใจตั้งต่อพระธรรม
อย่าส่างกรรมเวรมั้ว ให้กลัวเกรงมันสิถื้นนำไล่
มันบ่หย่านท่านผู้ใด๋ ปอบเวรกรรมสิหน่ำถื้น ใผขืนจ้ำหน่ำทวี
คันแหม่นพระสงฆ์ดีมีศรีจ้า
บำเพ็ญศีลสมาธิปัญญา มีศรีหน้าใสเกลี้ยงหมื่น
ใผมาเห็นกะซมซื่น อยากแต่นบแต่ไหว้บูชาไว้ถ่าแต่งทาน
ศึกษาฮู้รอบด้าน พุทธศาสน์มาสาธก
ไตรปิฎกอย่าได้สอนผิดเพี้ยน บิดเบียนเว้าหล่าย
ทำมะโกย โหยเงินหลาย
ทำลายพุทธศาสน์บอกไว้ นัยนี้บ่แหม่นคลอง
เทศน์เฉลิมฉลองให้ศรัทธาไทยจำเอาไว้ไปเฮ็ดต่อ
พระสงฆ์เป็นเบ้าหล่อเป็นผู้ก่อผู้ปั้น
สร้างสรรค์แต้มหมู่ประชา
ใช้สติปัญญา ศีลธรรมย้อม ลงสะสางล้างความซั่ว
มีมลทินหมองมัว บ่เกรงกลัวเกรงบาปฮ้าย
พระสงฆ์ป้ายกระหม่อมเจิม
อยากให้นำคลองเดิมพุทโธเจ้า
ศาสนาพุทธของเฮา บ่มีเส่า(เศร้า) บ่เคยหล่า
สิฮุ่งเฮือง เรืองวิไลใสเจิดจ้า ดีไปหน้าหย้อนพระสงฆ์ ฯ (ข้าน้อยเอย)
(มีต่อฉบับหน้า)